Iha loron feriadu, Riko bolu Ajai ho Nona atu bá pikenike iha tasi ho nia família. Ajai haksolok loos, nia lori ho nia viola. Riko-nia apá ho amá maka te’in atu sira han iha tasi.
Tuku 9 dadeer sira sai ona husi uma ho Riko sira-nia karreta. Iha dalan Ajai toka viola no sira hotu hananu. To’o iha tasi sira tulun malu hatún sasán sira. Ajai halai kedas bá tasi tanba nia hakarak tebes halimar iha rai-henek leten.
Teki-teki, Ajai sama fatuk ida no fatuk ne’e bele bookan. Ajai nakdedar no nia bolu Riko, “Riko…Riko… mai lai.” Riko sira mai no haree Ajai sama hela lenuk ida. Sira hotu hamnasa no dada Ajai nia liman.
Lenuk-nia ain belit hela fo’er sira iha tasi ne’ebé ema so’e arbiru. Lafaek Prima dehan, “Ita labele so’e fo’er arbiru, selae balada tasi sira bele mate hotu.” Sira mós tulun hasai tiha fo’er husi lenuk-nia ain no lori fali lenuk bá tasi.
Riko foti bola no sira baku bola iha rai-henek leten. Sira mós halo uma husi rai-henek. Riko-nia apá tunu na’an atu sira han. Meiudia ona, Riko-nia amá bolu sira atu han. Han hotu, sira deskansa no hariis fali tasi.
Loron-matan monu ona iha foho sorin, amá ho apá bolu sira atu fila bá uma. Riko, Ajai ho Nona haksolok tebes loron ne’e tanba nia bele tulun lenuk no halimar iha tasi ho nia belun sira. Ajai ho nia belun sira la haluha loron ne’e.
