“Labele baruk no ta’uk atu aprende, hodi
aproveita oportunidade tanba matenek
ne’e importante hodi bele hadia moris
família no nasaun.
Edukasaun hanesan xave ba dezenvolvimentu tanba ne’e husu ba inan ho aman
haruka oan bá eskola liuliu labarik feto
sira no labarik ho kondisaun difisiénsia.”
Maun Lafaek, Aldo no Marvinha bá iha Casa
Sidadania, Colmera Dili (24/07/2020), hodi
dada-lia ho fundadora Sentru Quesadhip Ruak,
Doutora Isabel Ruak Ferreira.
Hosi dada-lia ne’e atu tulun kanorin sira, liuliu
kanorin sira ho kondisaun difisiénsia atu
dada-lia ho lideransa sira, hodi hetan
esperiénsia foun.
Doutora Isabel dehan, “Timór tenke dezenvolve
área edukasaun di’ak liután hanesan nasaun
sira seluk.”
Nia mós hatutan, “Edukasaun maka xave ba
dezenvolvimentu. Joven ida iha koñesimentu
di’ak nia bele muda nia an, muda nia família
no muda nia nasaun.
Feto no mane atu sai lideransa tenke
laran-di’ak, labosok no dixiplina hodi sai
modelu ba ema seluk. Nu’udar feto lideransa
ida, ha’u iha knaar oin-rua. Ezemplu: Ha’u
nu’udar inan tau matan ba oan sira-nia saúde
no edukasaun.
Ha’u mós hanesan fundadora, lidera no tau
matan ba sentru ho di’ak.”
