Susubeen kór-kinur (Kolostrum), maka susubeen inan nian ne’ebé sai primeiru bainhira bebé foin moris. Susubeen ne’e sai ho kuantidade uitoan durante loron 3 to’o 4 no natoon ba bebé ne’ebé foin moris ninia presiza. Susubeen kolostrum hanesan imunizasaun primeiru ba bebé, ne’ebé riku ho nutriente hotu-hotu hodi proteje bebé husi moras diarreia, problema respiratóriu no infesaun seluk. Susubeen inan
kór-kinur ne’e mos, tulun hodi prevene bebé husi moras ikterus (moras kinur), hamoos bebé ninian intestinu (tee-oan) no riku liu ho vitamina A no minerál duke susubeen inan baibain.
Importante atu nafatin fó susubeen inan nian de’it (Eskluzivu)
durante fulan 6:
Susubeen inan nian, garantia bebé ninian presiza loroloron ho nutriente ne’ebé sei tulun bebé ninia kresimentu isin-lolon ho di’ak. Ho nune’e, importante tebes atu fó nafatin susubeen eskluzivu hahú husi bebé foin moris to’o fulan 6.
Benefísiu ba bebé:
1. Tulun bebé livre husi baktéria ne’ebé karik sei fó infesaun ba kulit no diarreia.
2. Bebé sei hetan susubeen iha tempu saida de’it, tanba susubeen inan iha temperatura ne’ebé di’ak no prontu atu fó ba bebé bainhira nia presiza.
3. Susubeen inan eskluzivu mós prevene bebé husi alerjia.
4. Tulun bebé iha abilidade aprende no lee ne’ebé di’ak iha futuru.
Benefísiu ba inan:
1. Tulun inan atu rekopera filafali nia saúde.
2. Proteje inan husi moras anemia no redús raan nakfakar hafoin partu. Susubeen ne’e iha efeitu kontraseptivu ne’ebé bele tulun inan atu la isin-rua filafali iha tempu badak.
3. Fó protesaun hodi kontra moras kankru susun no moras ováriu.
4. Salva inan husi problema susun bubu.
5. Hametin liután relasaun domin entre inan ho oan.
Benefísiu ba família:
Redús mortalidade ba bebé no hamenus gasta osan iha família hanesan sosa ai-moruk, biberón, xupeta, susubeen fórmula no seluk tan.
Analiza sosiál no asaun hodi tulun inan ho oan
La’en presiza suporta feen hodi fó susubeen inan kór-kinur no susubeen inan eskluzivu ho loloos ba bebé.
La’en presiza suporta feen liuhusi prepara ai-han nutritivu ba feen durante fó-susu.
La’en presiza akompaña feen hodi lori bebé bá postu saúde ka sentru saúde hodi hetan imunizasaun.
Fó susubeen kolostrum (Kinur) ba bebé, ne’e feen no la’en ninian responsabilidade.
Foti Husi Lafaek Ba Komunidade,1/2022
