Suku Laubonu iha paizajen
furak, maibé do’ok husi Atsabe
Vila no kondisaun estrada mós
ladún di’ak. Suku ne’e mós dook
husi ospitál. Iha grupu Hadomi
Inan, ha’u aprende barak konaba
ai-han ne’ebé iha nutrisaun
di’ak, importánsia atu halo espasu
oan ka KB, konsulta durante isinrua
no mós konsulta depois partu.
Ho motivasaun rasik no apoiu husi
membru família sira seluk liuliu
ha’u-nia kaben, ha’u neineik hahú
tau iha prátika ba informasaun
ne’ebé ha’u simu no komesa halo
mudansa ba hahalok balun.
Uluk, ha’u la fó espasu ba
ha’u-nia oan, maibé ha’u hanoin
karik ha’u fó espasu ba oan, ha’u
sei tau matan di’ak liu ba ha’u-nia
oan sira no mós iha forsa natoon
atu fó apoiu ba família. Ha’u-nia
oan uluk tinan tolu, foin nia alin
moris.
Ha’u fó-susu de’it ha’u-nia oan
durante fulan 6. Depois kontinua
fó sasoro. la’ós sasoro de’it maibé
sasoro ho modo-tahan ka sasoro
ho na’an. Agora, ha’u hatene ona
katak importante tebes atu fó hahán
oioin ba oan sira hanesan manutolun,
na’an, koto no modo-tahan
sira. La’ós sasoro tanan de’it tanba
oan sira presiza han ai-han oioin atu
sira-nia isin sai boot. Ha’u-nia oan sira
agora la fasil atu hetan moras no sira
ho kondisaun saúde ne’ebé di’ak.
Ha’u mós tuir tan servisu saúde
SISCa no hetan apoiu husi ha’u-nia
la’en. Ha’u mós hanoin katak atu
sai família ne’ebé saudável, ha’u
presiza simu informasaun barak. Tan
ne’e, ha’u-nia la’en ajuda ha’u iha
uma hodi tau matan ba oan sira no
halo servisu uma-laran bainhira ha’u
sai tiha. Ha’u sente tebes ninia apoiu.
Ha’u hanoin ita hotu-hotu bele
fó moris saudável ba ita-nia an no itania
oan sira, karik ita koko. Ha’u mós
aprende katak maske informasaun
di’ak, presiza mós apoiu husi família,
nunee ita uza infomasaun hirak ne’e
atu halo mudansa ba ita-nia an hodi
sai família ne’ebé saudável.
Foti Husi: Lafaek Ba Komunidade 3/2016
