Haktuir Konstituisaun Repúblika Demokrátika Timor-Leste (KRDTL) katak
sidadaun ho defisiénsia iha direitu no mós obrigasaun hanesan sidadaun sira
seluk no labele halo diskriminasaun ba sidadaun ida tanba nia kondisaun fíziku
ka mentál iha artigu 21, númeru 1, no Artigu 16, númeru 2.
Artigu sira iha Konstituisaun RDTL ho Polítika Nasionál ba ema ho defisiénsia hatudu
katak ema ho defisiénsia mós iha direitu hanesan ema ne’ebé maka la ho defisiénsia.
Baibain ita uza liafuan negativu ba ema ho defisiénsia sira no sira sente triste. Ita
hotu-hotu bele suporta sira liuhusi ko’alia di’ak atu nune’e sira bele kontente.
Liafuan ne’ebé mak ita bele ko’alia ka bolu sira mak: Ema ho problema fíziku,
ema ho problema matan, ema ho problema tilun, ema ho problema haree, ema ho problema mentál no problema intelektuál.
Ita labele bolu ema ho defisiénsia ho liafuan sira hanesan: Matan-aat,
Ain-aat, Tilun-diuk, La normál, Bulak, Ema-Beik, Mudu, Miring, Monok,
Ain-tohar, Liman-tohar, Liman-tuuk ho Ain-tuuk nst.
Iha Timor-Leste ita iha ona POLÍTIKA NASIONÁL INKLUZAUN NO PROMOSAUN BA DIREITU EMA HO DEFISIÉNSIA, asina iha data: 5 de Jullu 2012 husi Ministériu da Solidariedade Sosiál no aprova iha
Konsellu Ministru. Governu Timor-Leste seidauk asina no ratifika Konvensaun Direitu ba Portadores
Defisiénsia (UNCRPD/ United Nations Convention on the Rights of persons with Disability). Maibé
governu iha vontade ba asina no ratifika Konvensaun ne’e, espera katak iha tinan hirak oinmai bele
realiza.
Foti Husi: Lafaek Ba Komunidade, 2/2015
